Mat 16 | MCQ | STEP | Parasi 'ee Sajusiapo roareja Jesu vena ka'i 'ahiume Hura kahi akúpi 'ahi uneunecha ka'ene ea areri pavejujihi ve'amarono 'waravara.

Matthew 16

Ea Areri Pavejuji Veja Ka'i 'Ahiume Mi'imi'ivajina

(Maka 8:11-13; Ruku 12:54-56)

1 Parasi 'ee Sajusiapo roareja Jesu vena ka'i 'ahiume Hura kahi akúpi 'ahi uneunecha ka'ene ea areri pavejujihi ve'amarono 'waravara. 2 'Ejume Hu eha vene pu ijá 'iama Ja vea nusire'eju'e vea ka'ene apirauji ronare'e iviamaa vea mara'ena rojura. 3 'Enakaivo vu sú'u sú'uhijaho ja ijá 'wavure Vea nitu'eju'e vea 'aa'eju'e nutumujaho neha puuriji'i 'e'uhuna 'wavura. Ijihuni maijaho ja ijí vea mwapuna kajihi kimare'e ja ijaho 'wavura. 'Enakaivo iviamaakaho ja vea mwapuna ka'ene joni vaji iviamaa renujaho pakame paheju raka? 4 Ea sisea 'uasa veji'inapo uneunecha ka'ene ea areri paveji'inijija naja'avarono 'waravura. 'Enakaivo unenu'u pina najahuna pana kaivo Jonara raka ka'ene renajiru 'wara'ikai va'ana.

Parasia 'Ee Sajusia Puni Isitia

(Maka 8:14-21)

5 'E'eme Huni tisaiporua kara'i toa ropuna'i va'ara kaivo pu runamiume puretia pa'ekara. 6 'Ena'omo Jesura Huni tisaiporua ijá 'iama Hami ki'avara! Parasi 'ee Sajusia ijihipuni isitia aruma'enakúne hami ki'avara 'iamana. 7 'Ejume pu pira'arame ijá 'wava Ijihuni maijaho núra puretia pa'eka roajina 'wavara. 8 'Ejumakame Jesura pura pira'aravume henarene ijá 'iama Joni nimaaroa ma'u'ua. Ja irakijihuna'e nú puretia pa'ana 'wame nakaravo? 9 Ja majaa pahene pavwihajo? Puretia iropune ea mapoka mapoka (5,000) ijajaho 'ee katija icharo itusahajaho pavwihajo? 10 'Ene vukú'o puretia iropu no'one ea mapoka mapoka (4,000) ijajaho 'ee katija icharo itusahajaho pavwihajo? 11 Ja ichá venareja Nara puretia parone 'waravujaho pahejare? 'Enakaivo ja Parasia 'ee Sajusia ijihipuni isitia hami ki'avarono ronarejo 'waravuta 'iamana. 12 'Ejumakame pu iji'a hena kavara. Hu ijí puretia parone 'waramana vo ea Parasia 'ee Sajusia ijipo najahuji rona 'waramana.

Pitara Jesu Rona 'Waramajina

(Maka 8:27-30; Ruku 9:18-20)

13 'Enareja Jesuho 'urina Sesaria Piripai roarena Hu ijino Huni tisaiporu aporavi'i ijá 'iama Ea mapokakija Ema Puni Harihijaho irane 'wavure? 'iavume pu ijá 'wava 14 Ea 'aho'a Joni Papitisita 'wavume 'ee ea 'aho'a Iraijane 'ee ea 'aho'a Jeramaia 'ee ea 'aho'a poropetia pinina 'wavara. 15 'Ejume Hu ijá 'iama Ja Na ea irane 'wi'eja? 'iamana. 16 Saimani Pitara eha vene ijá 'wama A Kerisona. A Godi ka'ene mai'o hiji'inijihuni Hariha 'wamana. 17 'Ejume Jesura eha vene ijá 'wama Saimani ka'ene Pajona oni hariha karera nimerajahajaho aana. Ijihuni maijaho emaa haha 'ee 'aa rukini jipuhipo a panajahara kaivo Nuni Oma ka'ene akúpi 'ahi hinujara a najahana. 18 'Ena'omo Na kú'o pina 'waravu. A Pitana. 'Ena'omo ike muna anesina toakino Nuni sosia vehuna. 'Eje vena huni harurijaho paniname 'ee paasitahuna. 19 Nara Godoni ara huni kiijaho vajahuna. 'Ejakame ara iki mwe'i kamo'amajaho akúpa 'aha 'u'o kamohuna. 'Ene ara iki mwe'i rasa'amajaho akúpa 'aha 'u'o rasahuna 'wamana. 20 Hu Kerisona kaivo tisaiporua ea pa'wara'avarono 'waramana.

Jesura Ahija Apene 'Ee Kwahuniji Rone 'Waramajina

(Maka 8:31-9:1; Ruku 9:22-27)

21 'Enarena ijihuni vea kaji rene Jesu Kerisoho uneunecha mapoka ka'ene Hu Jerusaremi va'akame ea mama'ina pirisiti mama'ina Sikuraipi uneunecha ani ani vene hu sise'i 'aha'e 'anaa kwamareje na'ia no'opisu pa'areje 'urihuna Huni tisaiporu najahana. 22 'Ejumakame Pitara Hu ahema apene va'e karaa rori hine 'urarahe ijá 'wama Natohwe niho'o pana! Niho'o ija'ina parenahuna 'wamana. 23 'Ejumakame Jesura ta'arohe Pita ijá 'wama Setanikera túna'i rova'a 'wamana. A Na apene tanu'urihu ja'ina'e venu. A oni vwihijaho niho'o Godoni urija'ina pana kaivo emaa puni vwihija'ina vwihanu 'wamana.

Tisaiporu Rehuni 'Unamijaho Niho'o Kisina

24 'Enarena Jesura Huni tisaiporu ijá 'iama Ei pini Nuni túna'i roi ve'amajaho hu huni oja maka'i kaivo huni korosia apene Na 'ararihi'amana. 25 'Enakaivo ea irara huni hiiji ori ni'ajara'amajaho huni hiijaho ranahuna. 'Ene ea irara huni hiiji Nunijihuna'e hi'amajaho huni hia 'unanahuna. 26 'Enakaivo ei pini uneunecha ka'ene mwe'a kakehunijaho huna rerana'eje hia nimaa nimai iji asina'ipisa hu maa iraka apeja'e? 27 Ema Puni Harihijara ro'amajaho Amoni hanaji'ina 'ee Huni ona oji'ina pu'úmo rohuna. 'Ene ea kwinu kwino pura iraka ka'ene vejujaho eha ija'ina apehuna. 28 Emaa Puni Hariha Hura 'ajohuni kwaijaho ea ka'ene ike namiju kijahija mai'o pakwamasa'eje roe kahuna 'iamana.